Ինչպե՞ս հետազոտությունը, վերլուծությունն ու գիտելիքը դարձնել տեսանելի, հասանելի և հետաքրքիր ավելի լայն լսարանի համար։ Ինչպե՞ս ճիշտ բովանդակությունը հասցնել ճիշտ մարդկանց և դրա շուրջ ձևավորել հետաքրքրված համայնք։
«Ինլայթ» հանրային հետազոտությունների կենտրոնը փնտրում է հաղորդակցության և մարքեթինգի համակարգողի, ով կմիանա թիմին՝ օգնելու պատմել մեր աշխատանքի, հետազոտությունների, հրապարակումների և նախաձեռնությունների մասին և զարգացնել «Ինլայթ»-ի հաղորդակցությունն ու ներկայությունը տարբեր հարթակներում։
Այս դերը կարող է հատկապես հետաքրքիր լինել նրանց համար, ովքեր հետաքրքրված են հաղորդակցությամբ, մարքեթինգով, հանրային կապերով, թվային բովանդակությամբ և հասարակական գիտություններով և ցանկանում են իրենց մասնագիտական հմտություններն օգտագործել հանրային նշանակության գաղափարների ու գիտելիքի տարածման համար։
Դերը կամավորական է և չի ենթադրում ֆինանսական վարձատրություն։
Ի՞նչ ես անելու
Հաղորդակցություն և բովանդակության պլանավորում
- մասնակցելու ես «Ինլայթ»-ի հաղորդակցության ուղղությունների և տարեկան/ամսական հաղորդակցական պլանների մշակմանը,
- պլանավորելու և համակարգելու ես կազմակերպության հրապարակումները տարբեր հարթակներում,
- հետազոտական և վերլուծական բովանդակությունը վերածելու ես տարբեր լսարանների համար հասանելի և հետաքրքիր հաղորդակցության,
- մշակելու ես հրապարակումների, արշավների և միջոցառումների հիմնական հաղորդագրությունները։
Սոցիալական մեդիա և թվային հաղորդակցություն
- համակարգելու ես «Ինլայթ»-ի ներկայությունը Facebook, Instagram, LinkedIn և այլ համապատասխան հարթակներում,
- պլանավորելու և հրապարակելու ես սոցիալական մեդիայի բովանդակությունը,
- համագործակցելու ես դիզայներների, խմբագիրների, հեղինակների և հետազոտողների հետ՝ հրապարակումների ստեղծման և տարածման ամբողջ ընթացքում,
- հետևելու ես թվային հաղորդակցության նոր ձևաչափերին և առաջարկելու դրանց կիրառման համապատասխան լուծումներ։
Արշավներ և հանրային կապեր
- մասնակցելու ես «Ինլայթ»-ի ծրագրերի, հրապարակումների, միջոցառումների և նոր նախաձեռնությունների հաղորդակցական արշավների մշակմանն ու իրականացմանը,
- աջակցելու ես գործընկերների, լրատվամիջոցների և այլ շահակիցների հետ հաղորդակցության կազմակերպմանը,
- մասնակցելու ես հանրային միջոցառումների և մասնագիտական հանդիպումների հաղորդակցությանն ու լուսաբանմանը։
Լսարան և տվյալներ
- հետևելու ես սոցիալական մեդիայի, կայքի և այլ հարթակների հիմնական ցուցանիշներին,
- վերլուծելու ես հրապարակումների հասանելիությունը, լսարանի ներգրավվածությունն ու հաղորդակցական տարբեր ձևաչափերի արդյունավետությունը,
- տվյալների և հետադարձ կապի հիման վրա առաջարկելու ես հաղորդակցության բարելավման նոր մոտեցումներ։
Ո՞ւմ ենք փնտրում
Մեզ կարող ես միանալ, եթե՝
- հետաքրքրված ես հաղորդակցությամբ, մարքեթինգով, հանրային կապերով կամ թվային բովանդակությամբ,
- ունես հայերեն գրագետ և հստակ գրավոր խոսք,
- կարողանում ես բարդ գաղափարները վերածել պարզ, հետաքրքիր և լսարանին համապատասխան հաղորդագրությունների,
- հասկանում ես սոցիալական մեդիայի տարբեր հարթակների տրամաբանությունն ու լսարանների առանձնահատկությունները,
- կարողանում ես պլանավորել աշխատանքդ, պահպանել պայմանավորվածություններն ու վերջնաժամկետները,
- ունես ստեղծագործական և միաժամանակ ռազմավարական մտածողություն,
- նախաձեռնող ես և պատրաստ ես ոչ միայն իրականացնել, այլև առաջարկել նոր գաղափարներ,
- կարողանում ես արդյունավետ համագործակցել տարբեր մասնագիտական թիմերի հետ։
Հաղորդակցության, մարքեթինգի, լրագրության, հանրային կապերի կամ հարակից ոլորտում կրթությունը և/կամ աշխատանքային փորձը առավելություն է, բայց պարտադիր չէ։
Լրացուցիչ առավելություն կլինի, եթե՝
- աշխատել ես Meta Business Suite, LinkedIn կամ սոցիալական մեդիայի կառավարման այլ գործիքներով,
- ծանոթ ես Google Analytics, Google Search Console կամ այլ վերլուծական գործիքների,
- ունես SEO-ի հիմնական սկզբունքների իմացություն,
- աշխատել ես WordPress-ով կամ այլ content management համակարգով,
- ծանոթ ես Canva, Figma կամ այլ պարզ բովանդակության ստեղծման գործիքների,
- օգտագործել ես Asana, Trello կամ նախագծերի կառավարման այլ հարթակ,
- ունես անգլերենի աշխատանքային իմացություն։
Այս ամենին միաժամանակ տիրապետելը պարտադիր չէ․ մեզ համար առավել կարևոր են հաղորդակցական մտածողությունը, գրավոր խոսքը, պատասխանատվությունը և սովորելու պատրաստակամությունը։
Ի՞նչ է առաջարկում «Ինլայթ»-ը
Իրական նախագծեր և պատասխանատվություն։ Կաշխատես իրական հետազոտությունների, հրապարակումների, ծրագրերի և հանրային նախաձեռնությունների հաղորդակցության վրա՝ գաղափարից մինչև հրապարակում և արդյունքների վերլուծություն։
Մասնագիտական պորտֆոլիո։ Քո մասնակցությամբ իրականացված արշավները, հրապարակումները և հաղորդակցական նախագծերը կարող են դառնալ մասնագիտական պորտֆոլիոյիդ մաս։
Փորձարկելու հնարավորություն։ «Ինլայթ»-ում կարող ես առաջարկել նոր ձևաչափեր, հաղորդակցական լուծումներ և գաղափարներ ու փորձարկել դրանք իրական լսարանի հետ։
Ճկուն և հեռավար աշխատանք։ Համագործակցությունը հիմնականում կազմակերպվում է առցանց և ճկուն գրաֆիկով՝ թիմի հետ նախապես համաձայնեցված անելիքներով և վերջնաժամկետներով։
Միջմասնագիտական թիմ։ Կաշխատես հետազոտողների, վերլուծաբանների, խմբագիրների, թարգմանիչների և դիզայներների հետ՝ միաժամանակ ծանոթանալով հետազոտության ստեղծումից մինչև դրա հանրային հաղորդակցություն ամբողջ ճանապարհին։
Մասնագիտական զարգացում։ Հնարավորություն կունենաս մասնակցելու «Ինլայթ»-ի մասնագիտական հանդիպումներին, բանախոսություններին, քննարկումներին և կրթական այլ նախաձեռնություններին։
Կամավորության վկայական և երաշխավորագիր։ Համագործակցության պայմաններին համապատասխան՝ տրամադրում ենք կամավորական աշխատանքի վկայական, իսկ առնվազն 3 ամիս արդյունավետ համագործակցության դեպքում կարող ենք տրամադրել նաև երաշխավորագիր։
Ինչպե՞ս դիմել
«Ինլայթ»-ին որպես հաղորդակցության և մարքեթինգի համակարգող միանալու համար լրացրու հայտադիմումը:
Դիմումը ստանալուց հետո առավելագույնը երեք շաբաթվա ընթացքում կապ կհաստատենք հայտում նշված էլեկտրոնային հասցեով։
Խնդրում ենք ստուգել նաև նամակների Spam/Junk բաժինը՝ մեր հաղորդագրությունը բաց չթողնելու համար։
Մեր այլ հայտադիմումները.